NO COME TE, COMETE


Sfodrât il cîl di stelis, chê gnot,
Palide la comete si pierdeve intun mâr lusint.
Jenfri scûr e aur
Le ai judade jo a cirîsi il troi
Par il so lâ e lâ….
Mi à domandât alore
Se o vevi peraulis di lassâi
Che lis lein
I umign di cuant che e tornarà chenti
-ce sono mil agns e mil?-
Cu la man che e mi trimave o ai picjât, alore,
Su la sô code
Il libri des mês oris,
Tenlu tu, comete,
Che jo, che nô, ca jù, o sin piçui, no
Come te, comete,
Che tu vas vie,
Viers l’univiers

Di velût.


da “prime dal nuie”
2005 © Laurino Giovanni Nardin e Soldalissi culturâl Tormilaghis.




AMANTIS


Fofe di lûs clipe la nature covade intai miei braçs tant che une
frutine mi vai su la spale no sta lassâmi no sta lassâmi
No sta tarabossâti drenti inte lane e intal corean reste cun me
no sta sierâmi fûr
di chei modons grues e di chê puarte frede ti cuvierç jo cu la
mê cjarece di rosade no sta tradîmi
cul linçûl.
E la gnot, prime di lâ a durmî, mi cibiscje no tu mi vuelis vonde
ben tu doman tu cjarinarâs
la dì tu ti dismentearâs di me.
Viodêso, cumò, parcè che o scrîf poesiis parvie di chestis
amantis che o scuen dâur rispuestis
che lôr sì che mi capissin e ancje mi perdonin cheste vôs cussì
puare cheste piel cussì spaurose.


da “il discori dal timp”
2008 © Laurino Giovanni Nardin e Soldalissi culturâl Tormilaghis.